Oсновното јавно обвинителство отвори постапка за настанот во петокот каде истражител на СЈО и уште едно лице фотографирале објект за кој имале индиции дека е во сопственост на екс началникот на тајната полиција, Сашо Мијалков.
Според обвинителството, едно од лицата се дало во бегство, не сакало да се легитимира за да се утврди нивниот идентитет и овластувањата за постапките кои ги презело.
Обвинителството информира дека немале судска наредба за снимање и поради тоа биле повикани во полициската станица Центар, каде случајот бил документиран.
Доцна вечерта, во петокот специјалната јавна обвинителка, Катица Јанева отиде во полициската станица Центар и го зема истражителот кој беше задржан на разговор. Рече дека постапувал по нејзина наредба и бил на работна задача.