Германската канцеларка Ангела Меркел во Давос пледираше за потесна соработка на ЕУ-државите во надворешната политика, а се изјасни против национален егоизам и популизам, пишува Дојче веле.
Без оглед на бавниот процес на формирање нова влада во Берлин, Германија и натаму силно ќе придонесува во разрешување на конфликтите во светот, истакна денеска германската канцеларка Ангела Меркел во обраќањето на Светскиот економски форум во Давос.
Меркел инсистира на потесна соработка помеѓу ЕУ-државите во областа на надворешната политика. „Мораме да ја земеме својата судбина во сопствени раце, европската надворешна политика сѐ уште не е развиена во доволен степен“, рече таа, иако е тоа нужно, со оглед што „глобалните конфликти се наоѓаат пред нашите врати“. Како позитивен чекор Меркел го смета договорот за заедничка европска одбранбена политика.