Со транспаренти „Сакаме чист воздух“, „Скопје = Смогје“ и „Белите дробови ни се црни“, стотина граѓани денеска се собраа на протест во градскиот парк за да го искажат револтот од енормното загадување на амбиенталниот воздух.
Баже Јосифовски, од „Ајде Македонија“ рече дека Македонија има најголемо загадување од ПМ10-честички во Европа и дека има повеќе од 300 дена загадување на воздухот.
– Луѓето не се грижат за животната средина. Големите компании се најлоши, тие имаат пари да кажат дека се зелени, а ние секојдневно се задушуваме. Мораме постојано да си го бараме правото на чист воздух, но и да делуваме – рече Јосифовски.
Новинарката Менче Точи рече дека последиците од загадувањето може да бидат катастрофални и дека на Македонија и се случува катаклизма.
– Како да дишеме на жабри? Годишно по 1.300 луѓе умираат од загадувањето. Проблемот е сериозен и бара учество на централната и на локалните власти, кои делуваат несериозно и како раштиман клавир. Нешто мора да се смени, а ние мора да ја промениме свесноста – рече Точи.
Граѓанин од Кисела Вода рече дека крајно време е граѓаните да се освестат и дека сите имаме обврска за нашите деца. Тој додаде дека само со упорност ќе се дојде до саканиот резултат.
Дел од демонстрантите, носеа црни балони, кои го симболизираа загадувањето. На крајот од протестот балоните завршија во бараките каде што се наоѓа градската администрација.
извор: Мета