Поранешниот американски претседател Џорџ Буш денеска ги критикуваше изјавите на актуелниот американски претседател Доналд Трамп дека медиумите се „непријател на американскиот народ“.
-Јас сметам дека медиумите се незаменливи за демократијата, рече Буш гостувајќи во емисијата „Денес“ на телевизијата Ен-Би-Си (НБЦ).
Влијателниот советник на Трамп, Стив Бенон, медиумите ги смета за „спротивставена страна“, а Буш коментирајќи го овој негов став, истакна дека моќта може да биде многу заразна и дека е многу важно медиумите да ги повикаат на одговорност луѓето кои ќе ја злоупотребат својата моќ.
Буш, исто така, рече дека коментарите на Трамп за медиумите ги поткопуваат напорите на САД за промоција на демократијата и слободата на печатот во странство.