Министерот за надворешни работи Никола Димитров, во рамки на регионалната посета на нордиските земји, денеска се сретна со министерот за надворeшни работи на Кралството Шведска Маргот Валстром.
На средбата е усвоена Декларација за соработка меѓу Република Македонија и Кралството Шведска, со која, како што соопшти МНР, се потврдува поддршката за нашите стратешки цели и се утврдуваат полињата од заемен интерес за градење на понатамошна поконкретна соработка.
Министерот Димитров, како што информираат од неговиот кабинет, на средбата со својата шведска колешка ја потенцирал цврстата определба на реформската Влада за враќање на земјата на патот на европските интеграции, трасиран преку реални и темелни реформи во областите од суштинска важност и спроведување на политика на отворен дијалог со сите свои соседи, базирана на европските вредности и принципи, како и дека враќањето на влијанието и поддршката од нашите европски пријатели е клучна во таа смисла.
Валстром изразила силна и недвосмислена поддршка за активностите на новата македонска Влада за брзо ревитализирање на европската перспектива на Македонија и увери дека Шведска е искрено заинтересирана за зголемување на конкретната помош во области што се најкорисни за нашата реформска агенда.
Од МНР, информриаат дека на покана на министерот Димитров, е договорена возвратна посета на МНР Валстром на Македонија оваа есен.
Во рамки на својата посета на Стокхолм, министерот Димитров остварил средби и со првиот заменик-претседател на Парламентот на Кралството Шведска Тобиас Билстром, со членови на парламентарната Комисија за европски прашања, како и високи претставници на Институтот СИПРИ, меѓународниот центар Олаф Палме и Социјалдемократерна.
Нордиската турнеја на МНР Димитров продолжува утре со работна посета на Хелсинки, а завршува во петок со посета на Осло.