Гоце Седлоски денеска поднесе оставка од функцијата шеф на стручниот штаб на ФК Вардар, информира шампионот на Македонија преку клупскиот сајт.

– Донесов одлука да си поднесам оставка од местото шеф на стручен штаб на ФК Вардар, за доброто на сите во клубот. Ова размислував да го направам уште после вториот натпревар со ФК Копенхаген кој што го загубивме. Сепак, успеав да соберам сили и да го започнам македонското првенство. После загубениот натпревар со Шкендија, овие два дена размислував добро и денеска ја донесов оваа одлука. Тие два порази ме погодија многу бидејќи јас како човек не сум навикнат да губам, но и фудбалскиот клуб Вардар не е навикнат на порази, стои во образложението на Седлоски. Досегашниот тренер на „црвено-црните“ е задоволен од резултати во изминатите две сезони, како и на прикажаното на двомечот со Малме.

– Горд сум на постигнатото. Успеавме да освоиме две титули во две години, а горд сум и на победата над Малме и пласманот во третото квалификациско коло од Лигата на шампионите, како и домашната победа со Копенхаген, додава Седлоски. Сакам да се заблагодарам на играчите, управата и до сопственикот г-нот Сергеј Самсоненко од кој имав несебична поддршка во целиот период. Благодарност и до сите вработени во Фудбалскиот клуб Вардар. Жалам, дојде време да се разделиме. На фудбалскиот клуб Вардар му посакувам успех на европска сцена во плеј-офот од Лигата на Европа против Фенербахче, како и во домашното првенство и Купот на Македонија, вели на крајот во обраќањето досегашниот предводник на Вардар. Македонскиот шампион в четврток го очекува првиот дуел од пресметката со Фенербахче во плеј-офот за Лига Европа, па се чека одлуката на раководството за тоа кој ќе го води тимот на натпреварите со силниот турски противник.

Слични содржини