ВМРО-ДПМНЕ подготвува политички документ кој нема да ја наруши унитарноста на државата за излез од кризата, кој деновиве ќе биде усвоен од Извршниот комитет и потоа ќе им биде понуден на сите поголеми партии во Македонија, рече лидерот на ВМРО-ДПМНЕ, Никола Груевски, вечерва во интервју за ТВ Канал 5.
Според него, тој документ никого не фаворизира како партија ни како етничка заедница.
– Нашата партија ќе се однесува во рамките на дозволените по закон работи. Никој не може да предвиди што ќе прави народот. Народот е над политичарите. Нека му ја мисли тој што оди против волјата на народот. Ние понудивме две решенија – брзи предвремени парламентарни избори заедно со локалните или СДСМ да се откаже за платформата на албанските партии, односно да прифати малцинска влада при што сите министри би биле од СДСМ. Дури и да продолжи со неговото СЈО да удри по нас.
СЈО работи на тоа да се задуши ВМРО-ДПМНЕ со обвиненија, сите ние да се занимавеме со судења и да не се занимаваме со парламентот. Тоа е планот, тоа е акција не само да се оди кон поединци на ВМРО-ДПМНЕ, кон целото раководство на ВМРО-ДПМНЕ, да се нападне партијата, да се блокира нејзината сметка, да се заплени нејзиниот имот – рече Груевски.
– Очекуваме од Хан да ја осуди платформата договорена во Тирана, да осуди мешање на други држави во нашата држава – рече Груевски.
Според него, лидерот на СДСМ, Зоран Заев е преплашен за неговата иднина, зашто ќе треба да одговара за криминал и затоа се обидува да дојде за премиер и да влијае врз судиите.
Тој потсети дека законот за двојазичноста е донесен во 2008 година.
– Кога ВМРО-ДПМНЕ нема мнозинсто во парламентот единствено народот може да ја одбрани државата – рече Груевски.
На прашањето како е да се биде Никола Груевски во последно време, тој одговори:
– Јас и сите граѓани, живееме во историско време, за жал, ова време е такво во кое некој сака да ја разнебити нашата држава. Возбудливо е, предизвик и обврска да се направи се што е во моја моќ. Некои Македонија ја гледаат како непланирано вонбрачно дете.
Тој смета дека доколку се формира влада меѓу СДСМ и ДУИ и се наруши концептот за составување влада „победник со победник“ тогаш тоа ќе биде многу штетно за државата.
– Документот што е потпишан во Тирана и којшто е иницијатива на албанската Влада сам посебе е штетен за функционирањето на државата. Документот предвидува бинационална држава, наместо мултикултурна и унитарна држава. Бинационалноста започнува со воведување на двојазичноста на целата територија и води кон федерализација на државата што е цел на одредени надворешни центри уште многу одамна. Ние не се судираме првпат со оваа цел. Таа цел постои повеќе години, но сега го доживува почетокот на нејзината клуминација кога најдоа човек кој е подготвен заради неговите криминали да дојде на власт и да исполни се што ќе побараат од него, рече Груевски.