Кабинетот на Груевски потрошил 38 милиони евра за рекламни кампањи и пропаганда

од desk2

Кабинетот на поранешниот премиер, Никола Груевски за периодот од 2008 до 2015 година потрошил 38 милиони евра од буџетот, за рекламни кампањи кои биле емитувани на телевизиите и во електронските медиуми, информираше денеска на прес-конференцијата портпаролот на Владата, Миле Бошњаковски.

Тој додаде дека, во оваа сума не се пресметани трошоците за кампањи во 2006, 2007 и дел од 2016 година, бидејќи недостасувале документи за овие години.

Парите, како што информираше Бошњаковски, биле потрошени за кампањите за „Трето дете“, „Против абортус“, „Истражи ја Македонија“, „Ден на идеи“ итн.

– Овие 38 милиони евра биле потрошени само од кабинетот на поранешниот премиер Никола Груевски. Во оваа сума не влегуваат парите за кампањи кои биле потрошени од министерствата. Речиси 15 милиони евра биле дадени на неколку маркетинг агенции за продукција на кампањи. За истражување на јавното мислење биле потрошени 200.000 евра, но таа бројка не е конечна. За закуп на рекламен простор во електронските медиуми биле потрошени 23 милиони евра – рече Бошњаковски.

Тој рече дека не постоеле критериуми за распределба на парите за закуп на реклами.

– На пример, на 24 декември 2008 година, во еден ден биле префрлени 2.1250.000 евра на неколку национални телевизи. Ангажман на консултант за еден месец бил платен 30.000 евра. Нејасни се критериуми како се префрлени парите за закуп на реклами. На прв поглед изгледало според рејтинг, но немало критериуми. Одредени национални телевизии добивале повеќе од другите – додаде тој.

Тој кажа дека регионалните и локалните медиуми добивале многу малку пари за реклами или речиси воопшто, но по промена на сопственичката структура добивале значително повисоки суми, па така некои од договорите што се склучувале биле во вредност од 15.000 евра.

Бошњаковски потсети дела новата македонска влада ја прекинала негативната појава да биде најголем маркетиншки огласувач во државата.

Тој додаде дека постои основ Основното јавно обвинителство да се произнесе по овие трошења./Мета

Слични содржини