Почетна / Актуелно / Како да го напишете совршеното мотивационо писмо

Како да го напишете совршеното мотивационо писмо

Уредното и богато CV е добар прв чекор за наоѓање на ново работно место, но квалитетното мотивационо писмо може да ја направи разликата во моментот кога работодавецот ќе треба да одбере помеѓу неколкуте финални кандидати за работното место.

Најчестите дилеми се околу должината на мотивационото писмо, формалноста на неговата содржина и работите кои треба да бидат вметнати во него.

Според работодавците, најдобро е мотивационото писмо да биде формално напишано и содржината да изгледа уредно и прегледно. Бидејќи секогаш се почнува од адресата и личните детали, најдобро е вашата адреса, личното име и презиме, како и вашата e-mail адреса да ги напишете во десниот горен агол и да се обратите на потенцијалниот работодавач со „Драг господине/госпоѓо“ или некоја варијација на овој израз. Доколку сте мрзеливи и не сакате да ги поминете овие чекори, тогаш можете да се послужите со некоја од готовите верзии кои можат да се најдат на интернет.

Мотивационото писмо не треба да биде многу долго, бидејќи последна работа која сака да ја прави работодавецот е да изгуби време читајќи бескрајни писма од повеќе кандидати. Идеалната должина е една страна од А4 формат. Експертите за посредување на работни места велат дека работодавците веднаш ги отфрлаат генеричките, набрзина напишани мотивациони писма. Затоа, пробајте вашето мотивационо писмо да го направите оригинално и единствено.

Што се однесува до содржината, најдобро е во кратки црти да објасните зошто сакате да работите на работното место за кое аплицирате, зошто мислите дека вие сте вистинскиот кандидат и како можете да придонесете за успех на компанијата. Една од најголемите грешки е да се преувеличите себеси, бидејќи тоа изгледа неуверливо и надмено, со што ви се намалува шансата за добивање на работното место.

Ако во вашето CV имате набројано 20 квалитети, но само 4 од нив се релевантни за работното место, тогаш не губете време со останатите 16. Мотивационото писмо треба да биде концизно и лесно за читање, па затоа најдобро е да ги наброите само четирите кои ќе ве доближат чекор поблиску до работата.