Командантот на сојузничките НАТО сили во Европа американскиот генерал Куртис Скапароти, порача дека меѓународните заштитни сили (КФОР) ќе останат на Косово се додека е потребно.
Тој изрази загриженост поради најавите дека армијата на Косово се формира без промена на важечкиот косовски Устав.
Скапароти кој што во средата разговараше со српскиот воен и државен врв во Белград, порача дека целта на неговата посета е разговори за соработката на НАТО и Србија и нагласи дека „било каква промена во положбата на силите на КФОР зависи од условите на теренот“.
„КФОР ќе ја продолжи својата мисија да биде гаранција на слободата на движење и безбедносното опкружување на Косово, се додека тоа биде потребно“, изјави американскиот енерал Скапароти.
Командантот на НАТО за Европа, како што пренесуваат српските медиуми, изјавил дека НАТО Алијансата е загрижена од идејата дека Косовските безбедносни сили се трансформираат во косовска армија, а на тој процес не му претходат потребните промени на косовскиот Устав.
„НАТО Алијансата е загрижена поради предлогот Косовските безбедносни сили да се претворат во косовска армија без промена на Уставот“, изјави Скапароти и додаде:
„Но, НАТО Алијансата истовремено ја поздравува подготвеноста на сите заедници кои што живеат на Косово, се ангажираат во развивање на дебатата за иднината на Косовските безбедносни сили“, изјави американскиот генерал