Почетна / Актуелно / Кремљ: Русија се надева на обнова на дијалогот со САД

Кремљ: Русија се надева на обнова на дијалогот со САД

Русија се уште се надева дека ќе дојде до обнова на дијалогот со САД и покрај „сите штети“ врз билатералните односи што ги предизвика Вашингтон, изјави денеска портпаролот на Кремљ, Дмитриј Песков.


– Се надеваме дека со текот на времето кога нашите американски колеги ќе ги надминат нивните внатрешни проблеми, ќе започнеме дијалог и покрај штетите што по вина на Вашингтон им се нанесени на билатералните односи, нагласи Песков.

Тој ги отрфрли како неосновани обвинувњата дека Русија го оневозможува пристапот на тимот на Организацијата за забрана на хемиското оружје (ОПЦВ) до сирискиот град Дума, каде се тврди дека на 7 април бил извршен хемиски напад, што беше и повод за саботните напади на САД, Велика Британија и Франција врз Сирија.

Осврнувајќи се на американските санкции кон руски компании, Песков изјави дека Москва овие мерки ги смета за „форма на нечесна конкуренција“ и дека ќе одговори во согласност со интересите на Русија.
– Санкците кон Русија прераснуваат во фикс идеја. Се уште ги сметаме за незаконски и убедени сме дека секој економист може да увиди оти тие претставуваат обид за потиснување на руските компании од светскиот пазар, нагласи Песков.