Британскиот министер за надворешна трговија Лијам Фокс денеска изјави дека по Брегзит ќе бидат потребни уште две гoдини за целосно излегување на Велика Британија од ЕУ и за започнување преговори со други земји за слободна трговија.
Според Фокс, станува збор за двегодишен период на транзиција и на „имплементација на фазите“ откако Велика Британија формално ќе ја напушти Унијата на крајот од март 2019 година.
Тој смета дека ова не е ништо друго освен начин да се создадат потребните услови за да му се помогне на домашниот бизнис за сигурно и непречено работење.
Фокс вели дека нема ништо против создавање транзициски период и ги отрфла како неточни трдењата дека на овој начин се прави пат за да може Велика Британија да излезе од ЕУ, без да постигне договор.
– Секако, Британија ќе може да преживее и без договор со ЕУ за Брегзит, но ние сакаме еден целосен и сеопфатен договор со Унијата, изјави Фокс за Би-Би-Си.
Неговата изјава доаѓа по отворените судири и поделби во Владата околу Брегзит, посебно со министерот за финансии Филип Хамонд и неговите предупредувања дека би било „мошне опасно и тешко за бизнисот и за Британците“, доколку земјата ја напушти ЕУ без да се постигне договор со Брисел
Неколкумина владини министри, меѓу кои и шефот на дипломатијата Борис Џонсон, Мајкл Гоув, Лијам Фокс, па и министерот за Брегзит Дејвид Дејвис, повеќепати досега зборуваа за излез од Унијата и без договор.
Таквата идеја, претворена во закана, ја истакнуваше и премиерката Тереза Меј пред превремените парламентарни избори.
Фокс и припаѓа на групата „тврди“ евроскептици во Конзервативната партија и заговорник за напуштање на ЕУ. Тој ја уверуваше јавноста дека на Велика Британија ќе и биде подобро надвор од Унијата , тврдејќи дека веќе сега земјата има согласност од десетина земји за да почне преговори за слободна трговија.
Меѓутоа, сега тој е многу повнимателен во уверувањето на јавноста, а прифака и транзиција од две години, пред да се отпочне дијалог со други земји за постигнување трговски договори.