Француската актерка и добитничка на “Оскар” Марион Котијар објави дека е бремена. Тоа се случи неколку дена откако од озборувањата беше осомничена дека е причина за разводот на Анџелина Џоли со Бред Пит. 
40-годишната Марион напиша во Инстаграм дека чека второ дете од сопругот Гијом Кане.
Таа исто така го коментираше разводот на Џоли и Пит.
“Ова е прва и единствена реакција на сензационалната вест во која ненамерно ме вовлекоа”, истакна Котијар. Актерката истакна дека во принцип не коментира такви работи и не ги зема при срце. Но одлучила да изрази став, откако покрај разводот на Џоли и Пит беа погодени и нејзините најблиски.
“Прво, пред многу години јас го сретнав мажот на својот живот, таткото на нашиот син и на бебето што го очекуваме. Тој е мојата љубов, мојот најдобар пријател, единствениот кој ми е потребен “, напиша Котијар.
Ѕвездата им посака “побрзо заздравување” на медиумите и хејтерите кои побрзаа да ја вмешаат во скандалот. “Конечно, јас искрено посакувам на Анџелина и Бред, кои длабоко го почитувам, да најдат спокој во овој бурен момент. Со целата своја љубов, Марион “.
Првото дете на Котијар и Кане се роди во 2011 година. Таа се снима со Бред Пит во филмот “Сојузници”.
Гласот дека “хемијата” меѓу двајцата се шири надвор од сетот лизна малку пред Џоли да го разниша светот со веста дека се разведува со Бред Пит.