На полигонот Криволак американски и македонски војници ќе одржат заедничка воена вежба насловена како “Драгон рајд 17”. Вежбата ќе започне на 26 јули а ќе заврши на 8 август. На македонска територија ќе влезат околу 100 возила на Армијата на САД (транспортот и транзитот ќе се изведе со 5 конвои од по 20 инжинериски возила со опрема и персонал).
Целтa на вежбата е подобрување на интероперабилноста на АРМ со НАТО стандардите, зајакнување на постојното партнерство со САД како и демонстрација на можностите на вооружените сили на двете армии за помош и поддршка на цивилното општество. Дел од обуката која ќе се изведува за време на вежбата ќе биде и за забрзано изведување на деконтаминација, меѓусебно запознавање со лично вооружување на двете армии и изведување на гаѓања, инженериска изработка на слетна патека за беспилотно летало, чистење на рути од импровизирани експлозивни направи…
АРМ соопшти дека од 7 до 21 јули припадници на АРМ ќе учествуваат и на меѓународната вежба „Сајбер гардијан“ што ќе се одржи на територијата на Романија и Бугарија. На вежбата ќе учествуваат припадници на АРМ од составот на баталјонот на воена полиција и полкот за специјални операции.
Вежбата „Сајбер гардијан“ е во организација на Армијата на САД во Европа и на неа ќе учествуваат повеќе од 25.000 припадници од 23 армии на НАТО земјите членки и партнерските армии.