Главната дирекција на полицијата наредила да бидат суспендирани 7850 вработени од целата земја, пишува информативниот сајт “Хаберлер”, повикувајќи се на пост во весникот “Хуриет”. Наредбата била издадена синоќа.
Цела ноќ полицајци биле повикувани во Управата за да го предадат своето оружје. Претстои да бидат преземени и судски постапки, пишува уште весникот.
Досега по обидот за преврат се приведени 103 генерали и адмирали. Судот треба да одлучи дали високите воени лица ќе останат во притвор. Силите за безбедност во Турција продолжуваат да трагаат и по други војници, кои имаат врска со обидот за државен удар во земјата. Според податоците на претставници на безбедносните структури се уште продолжува потрагата по вооружени војници во различни турски градови и околоградските области.
Во исто време се пријавени најмалку 99 лица кои се уапсени во Анкара за врски со преврат. Според “Хаберлер” меѓу уапсените во главниот град е и Бригадниот генерал од турските воздухопловни сили Хаки Еврин.
Претходно денеска Телевизискиот канал “Хабер Турк” го објави апсењето на 12 генерали и адмирали. Тие се обвинети за “обид за воен удар”, “атентат врз претседателот” и “намерно убиство на луѓе”. Пријавено е исто така дека некои војници избегале прек граница.