Стотина членови и симпатизери на ВМРО-ДПМНЕ и вечерва протестираа пред Министерството за правда, барајќи ослободување и помилување на притворените лица за насилствата во Собранието од 27 април годинава, меѓу кои и пратениците Крсто Мукоски, Љубен Арнаудов и Сашо Василевски, Жаклина Пешевска, Јохан Тарчуловски и Љупчо Димовски.
И покрај најавите за повеќе блокади на раскрсници, беше блокирана само улицата пред Министерството за правда. На протестот присуствуваа лидерот на ВМРО-ДПМНЕ, Никола Груевски, генералниот секретар, Христијан Мицковски, поранешниот владин портпарол Александар Ѓоргиев, а свое обраќање пред демонстрантите имаа Мане Јаковлевски, Александар Николовски и Славчо Чадиев.
Јаковлевски, кој е еден од основачите на партијата, рече дека ВМРО-ДПМНЕ не е само политичка партија, туку и идеологија и оти секогаш по падовите и кризите се враќале како уште посилни. Тој последните притворања ги поистовети со затворањата на Голи Оток.
– За разлика од тогаш, денес сме многу кои сме задоени со идеалот за самостојна Македонија. Нема место сите да не уапсат, затворите се премали. Денес преку окупираните институции се празнат затворите од криминалци и терористи, а се полнат со патриоти, чија единствена вина е што ја сакат Македонија – рече Јаковлевски.
Чадиев говорејќи за денешното притворање на тројцата пратеници рече дека низ цела Европа веќе се проширила веста дека во Македонија владее хунта. Тој порача дека е лесно да се уништи нешто што се градело со децении, но дека треба да се стави крај на тоа и да им се даде поддршка на оние кои притворени во „Шутка“.
Николовски пак истакна дека ставањето во притвор 5 проценти од целокупниот пратенички состав, односно 12 проценти од пратеничката група на ВМРО-ДПМНЕ и Коалицијата е инсталирање на диктатура.
– Претставници на народот, луѓе за кои што народот гласал да го претставува во законодавниот дом, да бидат притворени е газење на сите демократски принципи, а ова им се случува втор пат, прво беа изнесени брутално со лисици на рацете од нивните домови, а денес судот под раководство на СДСМ и хунтата на Заев донесе одлука да ги притвори. Ова однесување води кон целосна поларизација и радикализација во Македонија. После овој потег денес, невозможен е веќе политичкиот дијалог во Собранието, вели Николовски, додавајќи дека веќе е невозможно да се гласа за закони, за европска агенда, за буџет и за реформи./извор Мета