Професорот Јован Стојаноски, од Факултетот за туризам во Охрид и актуелен координатор на советничката група на СДСМ, ги освои најголемиот број гласови на внатрепартиските избори за кандидати за градоначалник и за советници во Охрид.
Стојаноски остварил убедлива победа со неколку стотини гласови разлика пред второпласираниот кандидат за градоначалник, Науме Јованоски, поранешен претседател на општинската организација на СДСМ.
Првпат досега, во општинскиот разгранок на СДСМ во Охрид се одржани внатрепартиски избори за кандидати за градоначалник и за советници.
Претходно, од разгранокот, преку јавно обраќање, повикаа да се пријавуваат што повеќе кандидати за да се донесе нов квалитет и можност за избор од поширока листа на можни кандидати.
Меѓу другите, на градоначалничката позиција атакуваат пратеници, функционери во локалниот разгранок, членови на централниот и на извршниот одбор на партијата.
„Резултатите ќе имаат значително влијание врз утврдувањето на конечните кандидатски листи од страна на партиските тела и органи во СДСМ. Денешниот ден е празник на демократијата во СДСМ од Охрид и нова страница во партиското дејствување, не само во нашиот град, туку и во државата. Изборната постапка во СДСМ од Охрид е отворена, транспарентна и демократска“, порачуваат од локалниот разгранок на СДСМ./Meta