На 10 дена по конститутивната седница на новиот состав на Собранието, Ѓорге Иванов го даде мандатот на лидерот на ВМРО-ДПМНЕ, Никола Груевски, кој сега има 20 дена да направи коалиција со албанските партии со цел да добие повеќе од 61 пратеник.
За да може да добие мнозинство во Собранието и да формира влада, Груевски треба да ги прифати условите кои ги поставија на платформата ДУИ, БЕСА и Алијансата за Албанците. Сепак, албанските партии велат дека нема да прифатат формирање на влада со Груевски, бидејќи тој е осомничен од Специјалното јавно обвинителство за криминал.
– Алијансата за Албанците нема да учествува во составувањето на новата влада ако мандатор е Никола Груевски, осомничено лице од СЈО, вели Зулфи Адили од Унитети, партија која е дел од Алијансата за Албанците во изјава за „Фокус“ по веста дека Иванов денеска ќе му го додели мандатот на лидерот на ВМРО – ДПМНЕ.
Адили тврди дека во Унитети нема промена на ставот поткрепен и во Платформата што ја поддржаа партиите на Албанците, која е основа во преговорите за формирање на новата влада./а1он