Комисиската расправа на која се разгледуваше извештајот за работењето на Специјалното јавно обвинителство и на која пратениците и поставуваа прашања на специјалната јавна обвинителка, Катица Јанева заврши и ќе продолжи в понеделник.
По паузата, пратениците од власта и опозицијата продолжија со меѓусебните обвинувања во однос на работата на Специјалното јавно обвинителство, па така пратеникот на ВМРО-ДПМНЕ, Илија Димовски истакна дека „овие три дена се покажала неспособноста на Јанева да помогне во решевањето на политичката криза.“
Тој ја обвини Јанева дека е „последната надеж на СДСМ за на каков било начин да дојдат на власт.“
Пратеникот на ЛДП, Горан Милевски даде поддршка за работата и продолжување на мандатот на специјалната јавна обвинителка Катица Јанева и на СЈО.
– Овде се изнаслушав за презумција на невиност, а тоа го слушнав од луѓето кои што 10 години уста не отворија кога со вперен пиштол се апсеше Љубе Бошкоски. Тогаш не се сетија дека Бошкоски има жена и деца и дека тоа се гледа на телевизија – изјави Милевски./Meта