Рускиот опозициски политичар Алексеј Навални е префрлен во болница, откако врз неговото лице била фрлена антисептична боја.
Инцидентот се случил во Москва, во непосредна близина на зградата каде се наоѓа седиштето на Фондот за борба со корупција , што тој го има формирано.
Ова е вторпат, годинава, Навални да биде физички нападнат.
„Бојадисан во лицето, изгледам смешно, но тоа ужано боли“, напиша Навални на својата страница на Твитер.
По прегледот во болницата, лекарите констстирале изгореници по лицето од хемикалии, како и повреда на едното око. Полицијата соопшти дека не знае кој стои зад нападот.
Алексеј Навални е еден од најжестоките критичари на рускиот претседател Владимир Путин.
Тој претходно соопшти дека ќе се кандидира за претседателските избори во Русија, предвидени за идната година, но шансите да учествува во изборната трка се намалени, затоа што против него руските власти имаат покренато две обвинувања за наводни злоупотреби во управувањето со неговата канцеларија./a1on