Почетна / Актуелно / Сценарија за крај на правната држава

Сценарија за крај на правната држава

„Ако така се постапува, тоа ќе значи крај на правната држава. Граѓаните се загрижени каде ја водат државата“, вели професорот по уставно право Осман Кадриу.

Тврдењето дека доколку ВМРО-ДПМНЕ не формира сега влада, Иванов треба повторно да му го даде мандатот на Груевски се додека не состави влада, јавно го соопшти професорката по уставно право Тања Каракамишева.

„Тоа значи дека постапката мора да се врати од почеток и согласно Уставот истиот мандатар да проба повторно да состави Влада. На изборниот победник мора да му се остави толку време колку што е потребно за да се договори владина коалиција која ќе одговара на изборните резултати“, вели Каракамишева. 

Тоа е противуставно, категоричен е Кадриу. Потврдува дека во Уставот не е прецизирано, но постои уставна практика во Македонија. Во 92-та кога ВМРО-ДПМНЕ со апсолутно мнозинство не успеа да формира влада и го врати мандатот, потоа претседателот Глигоров го додели на следната партија, СДСМ. Во никој случај мандатот не го добива истата партија која не успеала да формира влада за 20 дена.

Политичката традиција и во други земји и во соседството и во Европа покажува дека нема таков случај како што промовира Каракамишева, туку мандатот за формирање влада го добива или партијата што има парламентарно мнозинство или секоја следна партија по освоени гласови. Свеж е примерот со Хрватска, но и Италија, Грција  или Шпанија, каде што се повторуваа изборите затоа што ниту една од партиите не состави коалиција. Во Италија со години најмногу гласови добиваше Комунистичката партија, но никогаш не формира влада бидејќи никој не сакаше да коалицира со нив. /Телма