Еден од уапсените и осомничените за терористичкиот напад во Барселона, признал дека бил планиран „многу поголем напад“, јавуваат француските медиуми, повикувајќи се на судски извори.
Четворица уапсени мажи, за кои се сомнева дека се дел од терористичка ќелија се појавиле пред судот во Мадрид под сомнение дека се вмешани во планирањето или изведувањето на двата напада во Каталонија, во кои загинаа 15 лица, а повеќе од 100 се повредени.
Пред судот се појавија Дрис Укабир, Мухамед Ала, Салх ел Јриб и Мухамед Хули Кемал. Тројца се уапсени на 17 и 18 август во градот Рипол, на северот на Каталонија, додека четвртиот во Алканар, каде во експлозија во куќа која ја користеле џихадистите за изработка на бомби загина мароканскиот имам Абделбаки ес Сати.
Шпанската полиција вчера потврди дека е убиен главниот осомничен за нападот со комби, извршен во четвртокот во Барселона. Станува збор за 22-годишниот Јунес Абујакуб од Мароко.
Останатите осомничени, за кои се верувало дека се дел од 12-члена ќелија, се уапсени, а дел се убиени или загинале во експлозијата која се случила ден пред нападот со комби.
Одговорноста за нападите ја презеде Исламска држава.