Високиот комесаријат на Обединетите нации за бегалци (УНХЦР) предупреди денеска на насобирање на бегалци и мигранти во Србија поради заострувањето на граничната контрола и затворањето на границите во соседните држави, кои се соочуваат со нов се поголем бегалски бран.
Нагласувајќи дека речиси четири илјади мигранти и бегалци секојдневно влегуваат во Грција и заминуваат кон север, претставникот на УНХЦР, Адријан Едвардс нагласи дека кризата е во пораст и дека се префрла од една држава во друга.
Тој додаде дека построгите гранични контроли, кои прво ги воведе Унгарија, а потоа и Хрватска, се закануваат со создавање на „тесно грло во Србија, која не е земја со силен систем за азиланти“.
– Нема да ги решите проблемите со затворањето на границите, додаде тој.
УНХЦР соопшти дека над 442.440 лица го минале Медитеранот од почетокот на годината, додека 2.921 лице загинале при тоа.