Носител на кандидатската листа за советници на Општина Карпош ги повика надлежните органи сериозно да пристапат кон овој случај.
Душко Весковски, носител на кандидатската листа за советници на Општина Карпош, со документи денеска презентираше како е отуѓено градежно земјиште, во сопственост на Република Македонија, а претставувано од градоначалникот Стевчо Јакимовски, со непосредна спогодба, склучена на 29.01.2016 година во Скопје.
– Имено, градежното земјиште со вкупна површина од 1.533м2 е продадено за 671.454 денари (речиси 11 илјади евра) на друштвото за производство, трговија и услуги ГРОМ ПРОМЕТ ДОЕЛ. Го прашуваме Јакимовски, како отуѓил државно земјиште за багателна цена слично како неговиот коалициски партнер Груевски?
Само 2 месеци подоцна по оттуѓувањето, истото земјиште заедно со легализираните објекти застапувано од ГРОМ ПРОМЕТ ДООЕЛ е продадено на фирмата Друштво за градежништво, инженеринг производство и трговија на големо и мало ДАБАР ДООЕЛ по цена од 36.900.000 денари или 600 илјади евра.
Прашуваме како е можно земјиште во еден од најатрактивните делови во Карпош (непосредно до ресторанот „Имес“) да биде отуѓено за скоро 11 илјади евра, а само 2 месеци подоцна истото земјиште заедно со неколку легализирани објекти да биде продадено за 600 илјади евра?
Ги повикуваме надлежните органи сериозно да пристапат кон овој случај и оваа сомнителна зделка! Одговорност мора да има – порача Весковски.
Тој рече дека гласот за Стевчо Јакимовски е глас за продолжување на криминалот во Карпош и побара на 15 октомври да се стави крај на, како што рече, расипничкото и неодговорно владеење во општината!