Ги напуштаат домовите за да спасат живи глави, но наидуваат на пекол. Грозоморни приказни раскажаа група мигранти пред камерите на Телма. Ги ограбуваат, малтретираат, им ги киднапираат жените и децата. Наместо да го најдат бараниот мир, остануваат и без семејствата. 30-ина мигранти од Сирија затекнавме во напуштено и разурнато складиште во близина на Гевгелија.

емигранти

По десетина луѓе се туткаа во една просторија, седејќи во темни и влажни места, исплашени да не ги пронајдат напаѓачите. Речиси сите зборуваа англиски и француски, но си ги криеја лицата од камерата, од страв да не ги препознаат. Првиот млад човек што ни пристапи беше очаен. Пред десетина дена му ја грабнале жената и децата. Тврди дека станува збор за организирана вооружена група.

Ги пречекувале близу границата, нудејќи им превоз до Србија за четири илјади евра по лице, но на крај ги ограбуваат и им се закануваат по живот.

Во групата имаше неколку бремени жени, мајки со бебиња. Без храна и лекови, велат дека секој ден е измачување.

Мигрантите често свратуваат во Миравци, да побарат помош или да купат храна храна од локалните продавници. Полето околу селото пак, е полно импровизирани засолништа направени меѓу жбунови и грмушки, каде најчесто преспиваат.

Жителите велат дека мигрантите се мирни и не прават проблеми. Миравци не е единственото место каде се минуваат мигранти. Може да ги сретнете во секое место од пограничниот регион.

Од образовани луѓе со кариери, семејства и исполнети животи, до жртви на војна и бездомници. Приказните на мигрантите се полни крв и солзи, недоискажани, неизвесни и речиси безнадежни.

 

Автори Сузана Мицева и Кире Пиличев – Телма

Слични содржини