Руските портали објавија дека две лица се повредени за време на воената вежба „Запад 2017“ на западот на земјата, кога хеликоптер по грешка испалил проектили кон паркирани возила.
На видео-снимката, објавена на порталот “66.ru news”, се гледаат два хеликоптера во низок лет, а еден од нив испалува ракета која експлодирала недалеку од група луѓе кои ја гледале вежбата.
Порталот наведува дека две лица се повредени, а две возила се уништени, како и дека инцидентот се случил во недела или во понеделник, пренесува AP.
Руската војска ја потврди веродостојноста на видео-снимката, но демантираше дека тоа се случило во понеделникот. Сепак, не потврдија ни кога и каде се случил инцидентот, а тврдат дека никој не е повреден.
Reuters наведува дека видео-снимката ја објавил порталот “Fontanka.ru” и дека на неа се гледа хеликоптер како испалил повеќе ракети на воен камион прекриен со камуфлажна мрежа.