Министерот за финансии, Драган Тевдовски недозволиво се обидува недоспеани обврски на државата да ги брои во долгови, само за да манипулира со бројките и да му удоволува на својот лидер и на партиските интереси, изјави на прес-конференција Лилјана Затуроска од ВМРО-ДПМНЕ.
Таа додаде дека „Зоран Заев од ракав кажува бројка дека централната власт има скриен долг од една милијарда евра, а Тевдовски потоа брза да го оправда ставајќи нереални бројки, броејќи долгови на општини.“
– Сакајќи да ја оправдаат својата лага на Зоран Заев, дека владата на ВМРО-ДПМНЕ оставила наводен скриен долг од една милијарда евра, излегоа на брзоплета прес-конференција во која ставиле се на куп и долгови на единици на локални самоуправи, локални јавни претпријатија и слично. Патем за скандалот да биде уште поголем тие во оваа манипулација користат и обврски кои се уште не се доспеани за наплата – изјави Затуроска.
Таа додаде дека министерот за финансии предложил ребаланс на буџет со кој се кратат сериозни ставки и проекти од областа на образованието и земјоделството.