Сириската криза може да биде решена само по политички пат, без воени средства, се вели во заедничката изјава на Русија, Иран и Турција по завршувањето на преговорите во Астана.
Иран, Русија и Турција ќе воспостават трилатерален механизам за набљудување и обезбедување на целосно почитување на примирјето во Сирија, спречување на какви било провокации и утврдување на деталите во врска со одвивањето на примирјето, соопштија трите земји.
Техеран, Москва и Анкара наведоа и дека ја поддржуваат подготвеноста на сириските вооружени опозициски групи да учествуваат во следната рунда преговори, која ќе биде одржана во Женева на 8 февруари и во примената на Резолуцијата 2254 на Советот за безбедност на ОН.
Засега не е јасно дали сириската опозиција и сириската Влада го поддржаа ова соопштение.
Специјалниот претставник на генералниот секретар на Обединетите нации за Сирија, Стефан де Мистура изјави вчера дека е оптимист во однос преговори за Сирија во Астана, јави ТАСС.
– Нема да навлегуваме во никакви политички дискусии и нема да се ангажираме со ништо, со што ќе ги замениме прашањата за зачувување на прекинот на огнот и за хуманитарните размери на кризата, за олеснувањето на страдањата на Сиријците, кои се под опсада, ослободување на задржани лица и доставката на помош, изјави вчера Јахја ал Ариси, портпарол на делегацијата на сириската опозиција.
– Сирискиот режим има интерес да го оттргне вниманието од тие прашања. Ако сирискиот режим смета дека нашето присуство во Астана значи дека ние се предаваме, тоа е само илузија, која си ја создава, додаде опозицискиот претставник.
Во преговорите во Астана беа вклучени седум страни, сириската Влада, сириската опозиција, Русија, Турција и Иран како гаранти за примирјето, специјалниот пратеник на ОН за Сирија Стефан де Мистура и американскиот амбасадор во Казахстан Џорџ Крол, како набљудувач.