Со мирен протест, жителите од тетовското село Волковија го искажаа своето незадоволство поради, како што рекоа, загадувањето на селските извори од кои се снабдуваат со вода за пиење.
Тие посочијa дека изворите се загадуваат поради градежни работи кои ги врши приватна фирма, ангажирана за изградба на Воспитно-поправен дом, кој се гради во близина на изворите и атарот на нивното село.
Според нив, фирмата врши нестручни ископи околу изворите, со цел водоводниот систем на домот, да се приклучи и снабдува со вода за пиење од селските извори.
– Деновиве почнаа да копаат околу изворите. Отворија пат и како што гледате тој пат се спушти до самите извори. Земјениот материјал од дупките кои ги ископаа, се спушта директно во изворите кои веќе се заматени, а и вреќи од цименто има тука. Ова од чист селски извор стана депонија – вели Русе Михајловски жител на Волковија.
Жителите велат дека случајот го пријавиле во полиција и бараат негово целосно расветлување. Тие не се согласуваат водоводниот систем од Воспитно-поправниот дом да се приклучи на селските извори, затоа што ќе се доведе во прашање снабдувањето со вода за пиење за селото.
Веќе неколку години мештаните од Волковија, протестираа поради изградбата домот, кој според нив ќе доведе до појава на криминални дејствија во нивното село, со оглед на тоа каква категорија на луѓе треба да престојуваат во оваа установа.
Домот се уште се гради, а според најавите на надлежните требаше да профункционира минатата година.