Авторскиот документарен филм на Драган Антоновски „ Медиуми, газди,новинари и работнички права “ ја доби специјалната награда за придонес кон слободата на медиумите на јубилејниот 20 Интернационален фестивал „Интерфер“ кој се оддржува во Апатин и Сомбор во Србија.
На вчерашното отворање на фестивалот „Златната Ника“ наградата на фестивалот на авторот Драган Антоновски му ја додели градоначалникот на Сомбор Саша Тодоровиќ.
Тој истакна дека се гордеат со секој нов лаурет на фестивалот и се среќни што вистинските автори сè уште работат по новинарските стандарди во име на вистината, бидејќи од ова што денес се гледа и чита по медиумите и не може да се дознае вистински што ни се случува во реалноста.
Наградениот Драган Антоновски рече дека од една страна го радува тоа што ја освојува оваа награда за придонес кон слободата на медиумите, што поминала неговата приказна, но од друга страна му е жал што состојбите во медиумите се исти и тука во Србија и во целиот регион, како и во Македонија.
– Атакот од политичките елити, притисоците стануваат константа и поради тоа е потребно здружување на новинарите и медиумските работници за одбрана на достоинството на новинарската професија .
На оваа јубилејно 20 издание на„ Интерфер“, пристигнаа досега најголем број на новинарски трудови од целиот регион. Тука се репортажите на RTS, B92, N1, VOA, ПРВА ТВ ,Политика, Blic, и други ТВ куќи и агенции од Хрватска , Словачка, Индија, Таџикистан и од целиот регион.
Директорот на фестивалот, Тања Попов од филмската академија од Белград, вели дека на интернационалниот фестивал оваа година имало рекорден број новинарски трудови од кои во официјалната селекција влегоа само 56. Селекцијата предвидува неколку категории, ТВ репортажи, фото, радиски и принт репортажи и општествено одговорни истражувачки репортажи.
– Многу работа за жирито, но не го зголемивме бројот на наградите , тоа остана стандардно. Првата награда е златната статуетка на божицата Ника, и плакета и повелба како втора и трета награда, за секоја категорија посебно. Драго ни е што овојпат нашата специјална награда е за долгодишниот новинар Драган Антоновски од Македонија
На наградениот документарец камерата е на Александар Трајковски, монтажа на Никола Славковски и пост продукција на „Порта ФМ“.
„Медиуми, газди, новинари и работнички права“ е документарен филм изработен како проект на ССНМ поддржан од „Мрежа 23“ , чија содржина говори за состојбите во македонските медиуми, злоупотребата на работничките права, отпуштања од газдите на медиумите и борбата на Синдикатот за правата и слободите на новинарите и медиуските работници.
Денеска на „Интерфер“, ќе бидат доделени и преостанатите награди по категории, а паралелно со прогласување на наградените се организираат и низа активности, дебати, изложби на фотографии и презентација на наградените трудови.