Зоран Заев пред ООН: Наша цел е влада која работи за граѓаните со кои повторно ја градиме демократијата (ВИДЕО

од Vladimir Zorba
Премиерот Зоран Заев се обрати меѓу светските лидери на панелот „Отворено владино партнерство – Враќање на довербата во владата“, во Њујорк, САД, во рамките на дебатите на Генералното собрание на Обединетите Нации.

– Воспоставувањето доверба меѓу владите, граѓаните и организациите од различни видови е од клучно значење за воспоставувањето транспарентни и енергични демократии – порача тој на почетокот од своето обраќање.

Премиерот Заев истакна дека Македонија неодамна преживеа сурова политичка криза, чиј круцијален дел беше пробивањето на приватноста на граѓаните, што доведе до сериозно поткопување на довербата на граѓаните. Тој се осврна на искуствата од Македонија, каде се покажа дека кризата може да се надмине само низ заедничка соработка со сите граѓани, организации и политички субјекти и со силна политичка волја да се одделат институциите од партиските влијанија, за да се создадат независни институции што работат исклучуво за граѓанските интереси.

– Како новоизбраната влада, еден од нашите највисоки приоритети е да покажеме подготвеност да слушаме. Ние сакаме да ги слушаме нашите граѓани. Работиме во насока на воспоставување механизми за континуирана консултација со Владата, нашите министерства и агенции. Сакаме да ја смениме културата на комуникација во Македонија – рече премиерот Заев.

Претседателот на Владата на Македонија потсети дека Република Македонија во 2011 година стана 35. членка на Партнерството за отворена влада и соопшти дека досега има направено три акциски планови. 219 институции, 224 невладини организации, 30 учесници во приватниот сектор, 9 универзитети и 7 дипломатски претставници имаат свој придонес во создавањето на тековниот акционен план за 2016-2018 година.

– Ние покриваме 8 теми, 35 обврски и планираме да постигнеме 100 цели. Посебно внимание обрнуваме на транспарентноста на Буџетот и одговорноста на владините институции, стандардизираните информации за јавните набавки и наративните извештаи за здравствените програми – додаде тој.

Работната група која врши надзор над спроведувањето на сегашното партнерство за отворена влада 2016-2018, предвидува нови механизми и вклучување на поголем број засегнати страни и останува фокусирана на транспарентност на Буџетот, јавни консултации и технолошки пристап за поголем број граѓани.

– Владата донесе одлука дека јавните информации ќе бидат обезбедени дигитално бесплатно. Ова е во согласност со нашиот план за демократски реформи, Планот 3-6-9 и нашата агенда за ЕУ. Граѓаните да можат да пристапат до разни апликации, платформи за е-демократија и платформи за отворени податоци – рече премиерот Заев.

Претседателот на Владата, Заев оцени дека собирот на оваа тема на светско ниво, покажува колку државите и раководствата се свесни за значењето на отвореноста на Владата, како што се стреми да работи и Владата на Република Македонија.

– Мојата порака денес е да дадеме живот на транспарентноста и на граѓанското учество. Да ја изградиме довербата во Владата и демократијата. Кога сите имаат еднакви шанси слободно да ги искажат своите загрижености и кога тие се сфаќаат сериозно, тогаш ние сме во заедничка и одржлива конекција со нашите граѓани за повторно градење и преиспитување на демократијата заедно – рече Заев.

 

Слични содржини