Значителен број парижани денеска побрзаа да се искапат во водите на Сена, откако градските власти дозволија капење во реката, по долгата операција на чистење, поттикнато од минатогодишното користење на реката како место на одржување на Олимписките игри.
Три места на брегот на Сена ќе може да примат до 1.000 пливачи дневно сѐ до 31 август, порачаа градските власти.
Инвестициите за чистење на речните води вклучуваа поврзување на десетици илјади домови на градската канализација, модернизација на постројките за пречистување на вода и изградба на големи резервоари за складирање на дождовниците, за да се спречи излевање на канализацијата при силни врнежи.
„Водата е чиста, топла е, бистра. Има малку алги, но тоа е нормално“, изјави за Ројтерс 51-годишната Карин, една од многуте што побрзаа да влезат во Сена за да се искапат.