АХВ: Африканската свинска чума е под контрола, мерки се преземени уште од 2019

од Nikola Popovski

Доколку посветено ја следеле работата на АХВ, наместо да сеат лаги и да ги манипулираат сточарите и јавноста, ВМРО-ДПМНЕ ќе знаеа дека мерката за забрана за чување на свињи на отворено за која тие наводно алармирале, е донесена и е на сила уште во 2019 година, заедно со сетот мерки за спречување на појава и ширење на вирусот африканска свинска чума во земјава, велат од Агенцијата за храна и ветеринарство (АХВ), како реакција на денешните обвинувања на Цветан Трипуновски, претседател на Комисија за земјоделие на ВМРО-ДПМНЕ.

Според АХВ, Болеста е под контрола и тоа одговорно го тврдат.

-Во експресено брз рок спроведена е мерката за депопулација на свињите во радиус од 3 километри од двете жаришта во Делчевско, а мерката за фармите со висок ризик, ќе продолжи да се спроведува и на фармите во зоната под надзор во радиус од 10 километри.

Во поглед на овој вирус, ефикасен е воспоставениот систем за контрола и лабораториско испитување на секоја пратка свинско месо и производи од свинско месо кои доаѓаат во земјава од држави каде болеста е потврдена, како резултат на што се уништени две пратки во кои е детектирано присуството на вирусот. Една по потекло од Бугарија, другата од Германија.

ВМРО-ДПМНЕ да не се грижи. Досега ефикасност е потврдена и на мерките за контрола на болеста кај дивата популација свињи, наведуваат од АХВ во реакцијата.

Од ВМРО-ДПМНЕ прашуваат дали Агенцијата за храна и ветеринарство и Владата на Република Македонија се на висината на задачата во справување со оваа подмолна и мошне опасна заразна болест кај свињите.

-АХВ и Владата не ја сфатија важноста на имплементирањето на превентивните мерки во спречување на појавата на болеста за кои укажавме уште 2019 година со носењето предлог сет мерки?, праша Трипуновски.

Слични содржини