АВИОН ИЗЛЕТА ОД ПИСТАТА: Во несреќа во Кина има повредени

Кинески патнички авион утринава излета од пистата при полетување во градот Чонгкинг, по што избувна пожар, јавија кинеските државни медиуми.

Сите 122 лица од авионот „Ербас А319-115“ во кој имало 113 патници се евакуирани, а повредените се префрлени во болница, јави агенцијата „Синхуа“.

Кинеските државни медиуми прикажаа видео од авионот на „Тибет ерлајнс“ кој испушта црн чад, објави „Кјодо“.

Некои патници се здобиле со полесни повреди.

Кон крајот на март, Боинг 737-800 се урна во регионот Гуангкси Жуанг, при што загинаа 132 лица во авион на China Eastern Airlines.