Американскиот претседател Џо Бајден на прес-конференција во Белата куќа зборуваше за воената помош што САД планираат да ја испратат за Украина.
На почетокот ја потврди веста дека САД ќе испратат моќни американски тенкови 31 М1 Абрамс во Украина.
– Тоа е еквивалентно на еден украински баталјон. Секретарот за одбрана Лојд Остин го препорача овој чекор бидејќи ќе го подобри капацитетот на Украина да ја брани својата територија и да постигне стратешки цели, рече Бајден и продолжи:
– Тенковите Абрамс се најмоќните во светот, но се и исклучително сложени за ракување и одржување. На Украина и даваме делови и опрема неопходни за нивно ефективно одржување на воено поле.
Тој рече дека испораката на овие тенкови ќе потрае, но дека САД ќе се погрижат украинските војници да бидат целосно подготвени да управуваат со тенковите.
– САД и Европа се целосно обединети во нивната поддршка за Украина против руската „навистина брутална агресија“, рече Бајден.
Бајден му се заблагодари на германскиот канцелар Олаф Шолц за неговата одлука сепак да ги испрати своите тенкови Леопард 2 во Украина.
– Шолц е близок пријател и силна поддршка за единството, рече тој.
Американскиот претседател потврди дека денеска имал долги разговори со сојузниците во НАТО, вклучувајќи ги Олаф Шолц, Емануел Макрон, Риши Сунак и Џорџија Мелони, за „да продолжи блиската координација“.
– Русија очекуваше да се распаднеме. Но, ние сме целосно обединети. Ако руските трупи се вратат во Русија, оваа војна би завршила денес. Ова е она што сите го сакаме – крај на војната во Украина. Не постои офанзивна закана за Русија, изјави тој.
Пред прес-конференцијата Бајден разговараше со лидерите на Германија, Велика Британија, Италија и Франција.
Да потсетиме, Германија најави дека ќе ги испрати своите тенкови Леопард 2 во Украина.