Американските власти денеска го идентификуваа 44-годишниот британски државјанин кој зеде четири лица како заложници во синагога во Тексас пред тимot на ФБИ да упадне во зграда и да стави крај на конфликтот што претседателот Џозеф Бајден го нарече терористички чин.
Малик Фајсал Акрам е убиен откако синоќа околу 21 часот последниот заложник излегол од синагогата во близина на Форт Ворт, пренесе АП.
Американскиот претседател Џо Бајден денеска изјави дека вооружениот напаѓач кој ја прекинал верската служба во синагога во Коливил, Тексас и зел четири лица како заложници, учествувал во терористички чин.
„Тоа беше терористички чин“, рече Бајден за време на денешната посета на Филаделфија, додавајќи дека нема доволно информации зошто напаѓачот ја нападнал синагогата, пренесе „Ројтерс“.
Заложниците, кои со часови беа чувани во синагогата во градот Коливил, се спасени синоќа, изјави гувернерот Грег Абот, со што заврши заложничката криза која траеше речиси 12 часа.
„Нашите молитви се одговорени. Сите заложници се живи и безбедни“, напиша Абот на својот твитер профил, а пренесе агенцијата АП.
Твитот на Абот дојде набргу по силна детонација и пукање во синагога, а полицијата посочи дека маж држел заложници и барал ослободување на пакистански невролог осуден за обид за убиство на американски воен офицер во Авганистан.
Киднаперот е прогласен за мртов, изјави полициски претставник кој побарал да остане анонимен, а детали за спасувачката операција и смртта на киднаперот засега не се објавени.