Демократскиот кандидат за претседател Џо Бајден изјави денеска дека гласачите нема да толерираат „злоупотреба на моќта“ доколку претседателот Доналд Трамп и републиканците ја назначат конзервативната судијка Ејми Кони Барет во Врховниот суд пред изборите на 3 ноември.
Анкетите покажуваат дека повеќето гласачи сакаат нов судија назначен од следниот претседател
Републиканците најавуваат дека брзо ќе ја потврдат Барет во телото во кое тие имаат мнозинство, а демократите признаваат дека немаат големи надежи дека ќе успеат да го запрат назначувањето, но дека сакаат претседателот и републиканците да ја платат цената на гласачките места.
Анкетите покажуваат дека повеќето гласачи сакаат нов судија назначен од следниот претседател. Бајден и неговите приврзаници сè повеќе предупредуваат дека Врховниот суд, со третото назначување на Трамп, може да го загрози пристапот до здравствена заштита за милиони Американци.
„Нема мистерии за тоа што се случува овде“, рече Бајден во говорот во неговата држава Делавер.
Ако Барет е именувана, тој стравува дека „Обамакер“ може да биде укинат
Доколку конзервативното мнозинство дополнително се зајакне во Врховниот суд со назначување на Барет, републиканците „ќе ја искористат можноста да го укинат законот за достапна грижа (АЦА)“, рече Бајден, повикувајќи се на законот воведен во 2010 година од претходниот претседател Барак Обама со кој се намали бројот неосигурани Американци.
Трамп повторно ја објави можноста Врховниот суд на САД да ја укине АЦА, позната како „Обамакер“, тврдејќи дека има подобар план за здравствена заштита.
„Обамакер ќе биде заменет со МНОГУ подобра и далеку поевтина алтернатива ако Врховниот суд ја укине“, напиша Трамп на својот Твитер профил.
„Тоа ќе биде голема победа за САД!“.
Демократите повторуваат дека брзањето да се назначи замена за неодамна починатиот либерален судија Рут Бадер Гинсбург е лицемерно бидејќи лидерот на републиканците во Сенатот, Мич Меконел во 2016 година не сакаше ниту да го слушне кандидатот на Обама за судот, Мерик Гарланд, девет месеци пред изборите.
Демократот во Сенатот, Дик Дурбин, рече дека демократското малцинство во тоа тело нема да ги принуди републиканците да го пополнат местото во толку краток период пред изборите. Гласањето веќе започна во неколку држави.
„Можеме да го забавиме за неколку часа, можеби неколку дена, но не можеме да го спречиме резултатот“, рече тој за телевизијата „АБЦ“.
Судиите се именуваат доживотно во Врховниот суд
Судиите се именуваат во Врховниот суд доживотно, а до смртта на Гинсбург, во него седеа пет конзервативни и четворица либерални судии. Трамп веќе назначи двајца конзервативни судии во неговиот мандат, а со новото назначување, институцијата може да се сврти подалеку надесно и да донесе промени во прашања како што се здравствената заштита и абортусот.