Во Барселона идентификувале не еден, не двајца, туку три напаѓачи, кои би биле потенцијални алтернативи на Ерлинг Халанд во случај клубот да не го привлече Норвежанецот.
Голгетерот на Борусија (Дортмунд) е цел бр. 1 за нападот на „блаугранас“, но конкуренцијата за него е многу сериозна и денеска изгледа тешко на Каталонците да се пресметаат со Манчестер Сити и Реал Мадрид, кои се главни фаворити за неговиот потпис.
Сепак, според „Ас“, претседателот на Барса, Жоан Лапорта му ветил на Чави Ернандез дека дури и ако не успее да го земе Халанд, следното лето ќе привлече уште еден врвен напаѓач на „Камп Ноу“.
Шпанското издание тврди дека втора најпосакувана опција е напаѓачот на Ливерпул Мохамед Салах, кој бележи уште една блескава сезона. Египќанецот се уште не може да се договори со клубот за нов договор, а сегашниот му истекува летото 2023 година. Тешко е да се замисли дека дури и Салах да не потпише повторно до лето, Ливерпул ќе се согласи да го продаде за 60-70 милиони евра, како што предлага „АС“. Сепак, изворот инсистира дека на „Камп Ноу“ добиле охрабрувачки првичен одговор од претставниците на Египќанецот.
Втората опција е гол-машината на Баерн (Минхен) Роберт Левандовски, кој во август ќе наполни 34 години. Полјакот има договор и до летото 2023 година, но во последните месеци се шпекулираше дека е подготвен да испроба и други предизвици пред крајот на кариерата.
Според „АС“, трета и последна опција е напаѓачот на Челси, Ромелу Лукаку, за кој, сепак, во Италија велат дека сака да се врати во Интер доколку го напушти „Стемфорд Бриџ“.