Соединетите држави негираат каква било вмешаност во обидот за државен удар во Белорусија и подготовки за обид за атентат врз претседателот Александар Лукашенко, изјави портпаролот на Белата куќа, Џен Псаки.
На новинарско прашање да ги коментираат изјавите за вмешаноста на САД во обидот за државен удар во Белорусија и обидот за атентат врз Лукашенко, Псаки одговори: „Можам да потврдам дека нема никаква основа за тоа“.
На 17 април, Лукашенко објави дека опозиционерот Григориј Костушев, политикологот Александар Федута и адвокатот Јуриј Зенковиќ планираат да го убијат него и неговите синови. Тој ги обвини американските разузнавачки служби и американското раководство за организирање на обидот за атентат. Според зборовите на директорот на КГБ на Белорусија, Иван Тертел, пучот бил планиран за јуни или јули оваа година.
Подоцна, Федералната служба за безбедност на Русија (ФСБ) извести дека во Русија, во заедничка специјална операција на ФСБ и КГБ на Белорусија, нелегалните активности на Јуриј Зенковиќ, кој има двојно американско и белоруско државјанство и белорускиот државјанин Александар Федута биле пресечени. Според ФСБ, тие планирале воен удар во Белорусија според разработеното сценарио на обоени револуции со учество на локални и украински националисти, како и физичка елиминација на белорускиот претседател.
Претходно, претставник на Стејт департментот изјави дека Соединетите држави негираат вмешаност во заговор со цел убиство на белорускиот претседател.