Не треба да се додаваат нови услови за почетокот на пристапните преговори со Северна Македонија, рекол денеска во Брисел германскиот министер за европски прашања Михаел Рот, коментирајќи ги најавите дека Софија може да го блокира Скопје.
„Не треба да додаваме нови критериуми и услови, покрај оние за кои веќе сме договориле. Ги повикувам сите да покажат конструктивен дух“, рекол Рот на прес-конференцијата по состанокот на министрите за европски прашања на земјите-членки на ЕУ.
Рот додал дека разговарал со бугарските партнери „затоа што мора да работиме врз основа на она што го договоривме заедно“, пренесуваат германските медиуми.
Минатата недела протече бугарски меморандум, според кој Софија изјави дека може да го блокира почетокот на преговорите за С. Македонија, доколку продолжат да инсистираат на посебен македонски идентитет и јазик во Скопје, односно за тоа на кого му припаѓа Гоце Делчев.
„Западен Балкан не е наш заден двор, туку внатрешен двор. Во интерес на сите земји-членки, особено на оние што се граничат со Западен Балкан, овие земји имаат европска перспектива и можат да станат место на мир, стабилност и помирување“, изјавил Рот.
Договор за отворање пристапни преговори со Албанија и С. Македонија беше постигнат за време на претседателството на Хрватска со Советот на ЕУ. Германското претседателство сега работи на организирање на првата конференција за пристапување за двете земји во декември. Ова исто така бара согласност од сите земји-членки.