Огромното мнозинство Бугари (83,8%) е против поддршката на С. Македонија за членство во Европската Унија сè додека не се постигне договор за фактите од историското минато на Бугарија. Ова го покажуваат податоците од социолошкото истражување на „Алфа Рисрч“, објави новинската агенција БГНЕС.
Само 10,2% од Бугарите сметаат дека нивната земја треба да ја поддржи С. Македонија на патот кон ЕУ, без оглед на нејзиниот однос кон фактите за историското минато на Бугарија, додека 5,9% одговориле дека не можат да одлучат.
Истражувањето барало одговор на односот на Бугарите по две важни прашања поврзани со македонскиот идентитет и јазик.
Повеќе од половина од испитаниците (54,10%)се на мислење дека Бугарија треба да го признае современиот македонски идентитет само доколку С. Македонија признае дека во почетокот на дваесеттиот век огромното мнозинство од нејзиното население се дефинирало како Бугари.
Скоро третина (29,5%) се против признавањето на македонскиот идентитет, а само 6,10% се со спротивно мислење. 10,2% рекле дека немаат мислење и не се заинтересирани за проблемот.
Огромното мнозинство исто така смета дека Бугарија треба да се согласи да започне преговори за членство на С. Македонија во ЕУ ако се откаже од антибугарската фондација врз која го гради својот модерен идентитет, негирајќи го бугарскиот идентитет на преродбениците како браќата Миладинови, или револуционери како Гоце Делчев.
Таквата позиција е целосно поддржана од 67,2%, а спротивно мислат 15,8%. 17 проценти од испитаниците немаат мислење.
76,1% од испитаниците ја поврзале бугарската согласност за започнување преговори со отстранување на текстови од учебниците и спомениците, во кои се наведува „бугарски фашистички окупатор“ во врска со бугарската администрација за време на Втората светска војна. Ваквото барање не е поддржано од 10,5% и 13,4% кои немаат мислење.