Копретседавачот на Европскиот совет за надворешни работи, шведскиот дипломат Карл Билд, оцени дека причина за ненадејното објавување на обвинителниот акт против косовскиот претседател Хашим Тачи може да биде што специјалниот обвинител имал индикации дека Тачи се обидувал да ја мобилизира Белата куќа за затворање на Специјалниот суд.
„Јас не би бил изненаден ако ваквите напори сега се интензивираат“, напиша Билд на Твитер.
По одлуката на премиерот на Косово, Авдулах Хоти, да се откаже од своето патување во Соединетите држави заради обвинението против Тачи, Билд изјави дека ова е крај на планираната средба во Белата куќа за односите меѓу Србија и Косово.
Билд го нарече обвинението против Тачи, до неодамна претседателот на косовскиот парламент, Кадри Весели и другите „политичка бомба за Косово и Балканот“.
Судот во Хаг ги обвини Тачи, Весели и други за злосторства против човештвото и воени злосторства.
Обвинението во моментов го проучува предистражен судија, кој потоа ќе одлучи дали ќе го потврди.
Главниот обвинител Џек Смит рече дека „сметал дека е неопходно да се објави обвинителниот акт поради повторените обиди на Тачи и Весели да ја опструираат и поткопаат работата на Обвинителството“.