„Билка“: Не сакаме да бидеме пренесени „жедни преку вода“ и да добиеме трошки, а бизнис секторот да добие се

од Nikola Popovski

„Легализацијата на канабисот е нормален чекор  по декриминализацијата“, велат активистите од здружението за канабис и зелени политики, „Билка“.

Тие велат дека не сакаат да бидат пренесени „жедни преку вода“ и да добиваат трошки, а бизнис секторот да добие се.

„Не може вие да сте бизнисмен со милион евра и оргомен број растенија, а јас со три грама канабис да бидам криминалец. Тоа е аспурдно, парадоксално и недозволиво“, сметаат од здружението.

Според „Билка“, извршната власт е наглува за нивните барањата.

– Канабисот да го препишуваат и лекари од приватното здравство, да се дозволи користење за многу повеќе болести, а не само за ХИВ, канцер, мултиплекс склероза и епилепсија кај деца, како и да се легализира за лична употреба во количина од 50 грама. Да се донесе закон за канабис како лек специјалис во кој ќе се инкорпорираат бројните области што ги тангираат канабисот, пациентите и уживателите, да се основа посебна агенција за канабис или засебно одделение при Бирото за лекови, како и да се формира посебен институт во рамките на Факултетот за земјоделски науки и храна преку измени на Законот за високо образование – бара „Билка“.

Дел од барањата се и секое правно лице кое ќе отвори фабрика за производство на канабис во земјава, да добие лиценца само ако се обврзе дека дел од производството ќе го пласира тука, на домашниот пазар. Лицемерно и небулозно е, смета Здружението, да се овозможи бизнис со канабис, а притоа граѓаните да немаат никаков бенефит.

– Сакаме да ги повикаме сите политички фактори, невладини организации, активисти и индивидуалци да се приклучат кон оваа здрава иницијатива. Навистина не знам зошто извршната власт останува наглува за нашите барања кои не се нешто неообјективно или нечуено во светот. Премиерот подолго време зборува на оваа тема, но засега не е сработено ништо и многу е дискутабилно што тој подразбира под декриминилизација на канабисот. Еве, сме пуштиле и официјално барање преку приемното одделение на Влада, ако сака да не повика, премиерот може многу лесно да не најде – истакна претседателот на „Билка“, Јанаки Митровски.

Според него, Здружението има постојан контакт со неколку пратеници од владејачкото мнозинство, но комуникацијата со извршната власт е послаба. Последната реализирана средба е со Љупчо Николовски, во периодот кога тој беше министер за земјоделство. Пред една недела „Билка“ поднела и барање за средба со премиерот Зоран Заев, министерот за здравство Венко Филипче, како и со министерот за правда, Бојан Маричиќ.

-Бараме и бришење на кривичната евиденција на сите уживатели на канабис кои се илегално гонети согласно Упатството на Републичкото јавно обвинителство за намера за продажба, легализација на канабисот како нормален тек по неговата декриминализација, дозволено одгледување до десет стебла за медицински цели од лица кои имаат здравствена потреба  која државата ја препознава и до три растенија за рекреативна употреба со задолжителна регистрација од страна на државно тело, истакна Митровски.

Слични содржини