Соединетите држави се подготвени за стабилни односи со Русија доколку ја сменат својата политика, изјави американскиот државен секретар Ентони Блинкен.
„Ако таа (Русија) го смени курсот, ние ќе бидеме подготвени да разговараме“, рече Блинкен во интервју за „Аксиос“.
Според него, претстојниот самит на претседателите на двете земји, Владимир Путин и Џо Бајден, во Женева следната недела тешко дека ќе ја покаже желбата на Москва да направи нешто слично.
Блинкен додаде дека американскиот лидер ќе се сретне со неговиот руски колега поради наводната „агресија и напад“ од Москва.
„Тој јасно и отворено ќе каже што може да се очекува од Соединетите Американски Држави ако продолжат агресивните непромислени активности против нас. Тој подеднакво ќе стави до знаење дека ако Русија избере поинаква политика во своите активности, ние ќе им дадеме приоритет на постабилните односи. Тоа ќе биде од корист за нашиот народ, рускиот народ, целиот свет – стратешка стабилност и контрола на оружјето“, истакна државниот секретар.
Блинкен не ја исклучи можноста по првиот состанок на лидерите на двете земји да се појави одредена јасност во иднината на односите.
„Во секој случај, подготвени сме и за двете (сценарија)“, заклучи Блинкен.
Претходно, самиот американски претседател во авторска статија за „Вашингтон пост“ изјави дека Вашингтон не бара конфликт со Москва, туку, напротив, сака стабилни односи, но тој изрази подготвеност да одговори на наводните постојни предизвици за европската безбедност.
Претходно, рускиот претседател Владимир Путин на Меѓународниот економски форум во Санкт Петербург рече дека на средбата со Бајден ќе биде потребно да се обидат да се најдат начини за регулирање на односите меѓу Русија и САД. Тој изјави дека треба да станува збор за стратешка стабилност, решавање на меѓународни конфликти во најпроблематичните точки, процеси за разоружување и борба против тероризмот и пандемиите.
Путин исто така рече дека не очекува никаков напредок од претстојната средба.