Блинкен за земјите кои ќе примат бегалци, меѓу кои и С.Македонија: Многу ја цениме поддршката што ја понудија

од Vladimir Zorba

Американскиот државен секретар Ентони Блинкен рече дека досега, покрај САД, 12 други земји се согласиле да прифатат бегалци од Авганистан, барем привремено, а меѓу нив се Северна Македонија, Албанија и Косово.

„Албанија, Канада, Колумбија, Костарика, Чиле, Косово, Северна Македонија, Мексико, Полска, Катар, Руанда и Уганда дадоа дарежливи понуди во однос на напорите за преместување на Авганистанци кои се во опасност“, рече Бликен, цитиран доцна синоќа од Стејт Департментот.

„Многу ја цениме поддршката што ја понудија и горди сме што работиме со нив во заедничка поддршка за авганистанскиот народ. Исто така, ние сме охрабрени што и другите земји размислуваат да понудат поддршка“, рече Блинкен.

Блинкен рече дека транзитот на евакуираните Авганистанци и државјани на други земји кои го напуштиле Авганистан е веќе, или ќе се направи, преку територијата на 14 земји.

Тоа се, како што изјави: Бахреин, Данска, Франција, Германија, Италија, Казахстан, Кувајт, Катар, Таџикистан, Турција, Украина, Обединетите Арапски Емирати, Велика Британија и Узбекистан.

Блинкен рече дека од 14 август, САД им овозможиле на околу 13.000 луѓе да го напуштат Кабул со американски авиони и да продолжат со спасувачката операција.

„Во текот на изминатите неколку дена, САД организираа невидена глобална акција за евакуација на американски државјани, вработени во земјите партнери и загрозени Авганистанци од Кабул преку нејзините дипломатски канали“, рече Блинкен.

„Сакам особено да им се заблагодарам на нашите партнери кои беа од клучно значење во оваа операција“, рече американскиот државен секретар.

Слични содржини