BMW стана уште еден автомобилски бренд кој го потврди своето учество во новата класа Hypercar во Светскиот шампионат за издржливост (WEC), при што Баварците ќе учествуваат со прототип според правилата LMDh. Вчера прототипот ги забележа првите тест кругови на патеката „Рикардо Палети“ во Варано, а во понеделникот имаше „шејкдаун“ на болидот.
BMW ќе стартува во американскиот шампионат IMSA веќе следната година, а во 2024 година ќе влезе во WEC и ќе се бори за првите позиции на 24 часа Ле Ман. Влезот во 2024 година ќе се совпадне со 25-годишнината од последното појавување на прототипот на BMW на Ле Ман – во 1999 година марката победи во 24-часовната трка со прототипот V12 LMR управуван од Јаник Далма, Јоаким Винкелхок и Пјерлуиџи Мартини.
Тоа ќе биде и првата WEC програма на компанијата со седиште во Минхен по неуспешниот обид 2018-2019 година со BMW M8 GTE – проект за кој фановите имаа големи очекувања, но кој никогаш не ги даде очекуваните резултати.
Прототипот на BMW, кој го придвижува V8 мотор кој работи со хибриден систем, е создаден со активна помош на специјализираната италијанска компанија „Dallara“, а во понеделникот автомобилот го возеле Конор де Филипи и Шелдон ван дер Линде.
BMW стана четвртиот производител на автомобили кој забележа успешен тест на прототип LMDh по Porsche, Cadillac и Acura, при што сите четири компании ќе се натпреваруваат во новата GTP класа на IMSA следната година. Новиот прототип на BMW ќе го има своето тркачко деби во јануари на „24 часа Дејтона“ во САД.
BMW ја довери изградбата на шасијата на прототипот на „Dallara“, а погонот користи турбо верзија на моторот P66/3 што се користеше во BMW M4 во DTM во сезоните 2018-2019. 4-литарскиот мотор работи со хибриден систем развиен заеднички од Williams Advanced Engineering, Bosch и Xtrac, а овие системи ќе бидат стандардни за автомобилите LMDh.