Лидерите на ЕУ и Кина ќе се сретнат за прв пат по две години во петок, а Брисел ќе бара гаранции од Пекинг дека нема да испорача оружје на Русија и нема да и помога на Москва да ги заобиколи западните санкции наметнати на Украина.
Европските претставници ангажирани во подготовките за самитот рекоа дека каква било помош за Русија ќе наштети на меѓународниот углед на Кина и ќе ги загрози односите со двата нејзини најголеми трговски партнери – Европа и Соединетите држави.
Претседателите на Европската комисија и на Европскиот совет, Урсула фон дер Лејен и Шарл Мишел ќе одржат виртуелен самит со кинескиот премиер Ли Кечијанг, а потоа и со претседателот Си Џинпинг.
Ставот на Кина кон Русија, рече еден претставник на ЕУ, ќе биде „прашање од милион долари“ во петок.
Една четвртина од глобалната трговија на Кина минатата година беше меѓу ЕУ и САД, додека трговијата со Русија изнесува само 2,4 отсто, потсети друг европски функционер.
„Дали ќе ја продолжиме оваа војна или ќе работиме заедно за да ја прекинеме? Тоа ќе биде клучното прашање на самитот“, додаде тој.
Кинескиот министер за надворешни работи Ванг Ји повторно повика на мировни преговори оваа недела, нагласувајќи дека легитимната загриженост на двете страни мора да се земе во предвид.
Ванг Јивеи, експерт за Европа на Универзитетот Ренмин во Пекинг, рече дека и ЕУ и Кина сакаат крај на војната и дека Пекинг ќе го искористи самитот за да одржи разговори за да создаде услови прифатливи за Путин за да го омекне неговиот сегашен став.
Истовремено, Кина е загрижена што ЕУ ги следи САД во спроведувањето на цврсти мерки и политики кон Русија и го повикува Брисел „да го исклучи надворешното мешање“ од разговорите со Кина.