Велика Британија се соочува со најголемиот штрајк на здравствените работници во историјата, а десетици илјади медицински сестри и работници за итни случаи ќе ги напуштат своите работни места поради спорот за платите со владата, пренесува Ројтерс.
Медицинските сестри и работниците за итни случаи протестираат одделно од крајот на минатата година, но заедничкото напуштање во понеделник, главно во Англија, ќе биде најголемиот штрајк во 75-годишната историја на Националната здравствена служба (NHS), според британската агенција.
Здравствените работници бараат зголемување на платите што треба да биде во чекор со инфлацијата во Британија, а британската влада тврди дека двоцифрено зголемување на платите во јавниот сектор би довело до уште поголема инфлација.
Синдикатот на медицинските сестри бараше зголемување на платите за пет отсто над инфлацијата, иако беше кажано дека ќе прифатат помала понуда, но двете страни не успеаја да постигнат договор и покрај неколкунеделните преговори.
Во исто време, илјадници работници на брзата помош најавија национален штрајк на 10 февруари поради ниските плати и недостигот на персонал, објавија синдикатите GMB и Junison.
Беше прецизирано дека нема да штрајкуваат сите работници на Брзата помош одеднаш и дека ќе се одговара на итните повици.
Околу 500.000 работници, од кои многумина во јавниот сектор, штрајкуваат од минатото лето, што го зголеми притисокот врз премиерот Риши Сунак и владата, која треба да ги реши споровите и да ги ограничи нарушувањата на јавните услуги, како што се железницата и училиштата.
Сунак минатата недела рече дека „би сакал да им даде на медицинските сестри зголемување на платата“, но рече дека владата се соочува со тешки избори и дека мора да го финансира NHS во други области, како што се обезбедување медицинска опрема и амбулантни возила, според Ројтерс.