Денес италијанската влада објави нови мерки за борба против коронавирусот, по неколкудневниот раст на бројот на новозаразени.
Владата на Џузепе Конте и претставниците на регионалните власти се согласија да го скратат работното време на баровите и рестораните до 18 часот, како и да затворат спортски сали, кина и базени, казина и ноќни клубови. Властите исто така ги повикаа луѓето да не излегуваат непотребно и да ограничуваат контакт со некој друг, освен со потесното семејство.
По насилните протести во Неапол поради најавените мерки, властите не воведоа полициски час на ниво на целата земја или делумно затворање, а повеќето продавници и компании работат „нормално“.
Официјалните лица, исто така, повикаа три четвртини од часовите да се спроведуваат преку Интернет, како и на раководствата на училиштата да го ограничат бројот на ученици во училиштата.
Италија, која беше најтешко погодена западна земја во првиот бран на пандемијата, сега е „подобра“ од Шпанија и Франција, кои пријавија повеќе од милион заразени, но бројот на новозаболени расте експоненцијално и здравствените служби се под огромен притисок.
Медиумите објавија дека во Италија луѓето умираат чекајќи кревет во болница.
Според последните податоци, во Италија вчера се регистрирани 19.644 нови случаи на Ковид-19, а пријавени се и 151 смртни случаи како резултат на оваа респираторна инфекција.