„Претседателот (Румен) Радев мора да даде јасен одговор зошто Бугарија е присутна во информациите што ги изнесе руската страна за експлозијата на Кримскиот мост“, се вели во соопштението на бугарската партија БСП.
Оттаму инсистираат Радев под итно да им ја довери истрагата за случајот со камионот што тргна од Бургас на бугарските власти.
„Во оваа растечка конфронтација треба да се даде брз и јасен сигнал и да не се дозволи Бугарија на кој било начин да биде вовлечена во конфликтот“, категорични се од БСП.
Експлозијата на мостот на Крим ја организирале украинските специјални служби, изјави вчера рускиот претседател Владимир Путин, цитиран од ТАСС. На состанокот со шефот на Истражниот комитет на Руската Федерација, Александар Бастрикин, тој дури го нарече „атентат“ она што се случи.
Бастрикин го потврди ова и додаде дека државјани на Русија и на странски земји им помогнале на украинските специјални служби во подготовката на нападот. Според него, Истражниот комитет на Русија ја утврдил рутата на камионот кој експлодира на мостот – тоа е Бугарија, Грузија, Ерменија, Северна Осетија, Краснодарската територија.
Во врска со вонредната состојба, шефот на Истражниот комитет рече: „Дадени се соодветни инструкции за спроведување на оперативно-истражни активности од страна на органите на ФСБ, Министерството за внатрешни работи на Русија“. Отворена е кривична постапка за тероризам за експлозијата на мостот на Крим“.
Првичните податоци од истрагата покажуваат дека експлозијата ја организирале украинските специјални служби со цел „уништување на голем цивилен инфраструктурен објект“.